ଓଡିଶାରେ କ୍ରିକେଟ ପ୍ରତିଭାର ବିକାଶ ହେଉ

             ଓଡିଶାରେ କ୍ରିକେଟ ପ୍ରତିଭାର ବିକାଶ ହେଉ

            (Odisha Bhaskar has published this article on 23.02.2023)

ଓଡିଶାର ରଞ୍ଜୀବ ବିଶ୍ଵାଳ, ଶିବ ସୁନ୍ଦର ଦାସ ଓ ଦେବାଶିଷ ମହାନ୍ତି ଭାରତୀୟ କ୍ରିକେଟ ଦଳରେ  ନିଜକୁ  ଉଦୀୟମାନ ଖେଳାଳି ଭାବରେ ପ୍ରତିଷ୍ଠିତ କରିପାରିଥିଲେ  I  ଅଲ ରାଉଣ୍ଡର ରଞ୍ଜୀବ ବିଶ୍ଵାଳ ଭାରତୀୟ ଅଣ୍ଡର 19 ଦଳର ନେତୃତ୍ଵ ନେଇ ୧୯୮୯ ରେ ଢ଼ାକାରେ ହୋଇଥିବା ଯୁବ ଏସିଆ କପରେ ଭାରତକୁ ବିଜୟୀ କରିଥିଲେ  I  ରାଂଜିବଙ୍କ ଅଧିନାୟକତ୍ୱରେ ସୌରଭ ଗାଙ୍ଗୁଲି, ଅଜୟ ଜାଡେଜା, ଅନିଲ କୁମ୍ବଲେ ଓ ବିନୋଦ କ୍ୟାମ୍ବ୍ଲି ଖେଳିଥିଲେ  I  ରଞ୍ଜୀବ ୧୯୮୮ରେ ଲଣ୍ଡନରେ ହୋଇଥିବା  ଯୁବ ବିଶ୍ୱ କପରେ ଭାରତର ମଧ୍ୟ ପ୍ରତିନିଧିତ୍ବ କରିଥିଲେ  I  ସେ ୪୧ ଟି ଫାଷ୍ଟ କ୍ଲାସ ମ୍ୟାଚ ଖେଳି ପାଞ୍ଚୋଟି ଶତକ ସହ ୨୧୭୦ ରନ କରିଛନ୍ତି  I  ରଞ୍ଜୀବ ଆକ୍ରମଣାତ୍ମକ  ବ୍ୟାଟିଂ କରିବା ସଂଗେ ସଂଗେ ଅଫ ସ୍ପିନରେ ବିଭିଧତା ଆଣି ଅନୁଭବୀ ବ୍ୟାଟ୍ସମ୍ୟାନମାନଙ୍କୁ ଆଚମ୍ବିତ କରିଦେଉଥିଲେ  I   ଭାରତୀୟ ଟିମରେ ରଞ୍ଜୀବ ଲମ୍ବା ସମୟ ପାଇଁ ଖେଳିଥିଲେ ଭାରତ ପାଇଁ ଅନେକ ସଫଳତା ଆଣିପାରିଥାନ୍ତେ  I   ଶିବ ସୁନ୍ଦର ଦାସ ଭାରତ ପାଇଁ ୨୩ ଟି  ଟେଷ୍ଟ ମ୍ୟାଚ ଖେଳି ଦୁଇଟି ଟେଷ୍ଟ ଶତକ ସହିତ ୧୩୨୬ ରନ କରିଛନ୍ତି  I  ଶିବ ସୁନ୍ଦର ଦାସ ସମ୍ପୂର୍ଣ୍ଣ ବ୍ୟଟ୍ସମ୍ୟାନ ଥିଲେ ତାଙ୍କର କ୍ରିକେଟ ଶୈଳୀ ସୁନୀଲ ଗାଭାସ୍କରଙ୍କ ଭଳି ଥିଲାବୋଲି କେତେକ କ୍ରିକେଟ ବିଶାରଦମାନେ ମତ ଦେଇଛନ୍ତି I ତାଙ୍କର ଡିଫେନ୍ସ ବହୁତ ମଝ୍ଭୁତ ଥିଲା ଓ ସେ V  ଆରିଆରେ ସୁନ୍ଦର ଭଙ୍ଗୀରେ  ଡ୍ରାଇଭ ଶଟ ମାରି ରନ କରୁଥିଲେ  I  ଦାସଙ୍କର ବ୍ୟାଟିଂ ଟେକନିକରେ ତ୍ରୁଟି ନଥିଲା ଓ ସେ ରାହୁଲ ଦ୍ରାବିଡ଼ଙ୍କ ଭଳି ଏକ କୀର୍ତ୍ତିମାନ ବ୍ୟାଟ୍ସମାନ ହୋଇପାରିଥାନ୍ତେ  I   ମୁମ୍ବାଇ,  ଦିଲ୍ଲୀ ଓ ବାଙ୍ଗାଲୋରର କ୍ରିକେଟରଙ୍କ ଭଳି ଦାସଙ୍କୁ ସୁଯୋଗ ମିଳିଥିଲେ ସେ ଭାରତୀୟ ଟିମରେ ପ୍ରତିଷ୍ଟିତ ହୋଇ ପାରିଥାନ୍ତେ I     ମଧ୍ୟମ-ଦ୍ରୁତ ଗତି (Medium  fast ) ସୁଇଙ୍ଗ ବୋଲର ଦେବାଶିଷ ମହାନ୍ତିଙ୍କ ପ୍ରତିଭା ୧୯୯୯ ରେ ଲଣ୍ଡନ ୱାର୍ଲ୍ଡ କପରେ ଜଣାପଡିଥିଲା  I  ପ୍ରଥମ ପାଞ୍ଚ ଓଭରରେ ଦେବଶିଶଙ୍କୁ କୌଣସି ଓପନିଂ ବ୍ୟାଟ୍ସମାନ ଆତ୍ମବିଶ୍ୱାସର ସହିତ ଖେଳିପାରୁନଥିଲେ  I  ଦେବାଶିଷଙ୍କ ସୁଇଙ୍ଗ ବୋଲିଂର ବିଭିଧତା, ବଡ଼ି ଲାଙ୍ଗୁଏଜ, ଦୌଡିବା ଓ ବଲ ପକାଇବା ଶୈଳୀ ଅତି ଉଚ୍ଚ କୋଟୀର ଥିଲା  I  ବ୍ୟାଟ୍ସମ୍ୟାନମାନେ ଦେବାଶିଷଙ୍କର ଇନ ସୁଇଙ୍ଗ ଓ ଆଉଟ ସୁଇଙ୍ଗ ବଲ ଭିତରେ ଫରକ ଜାଣିନପାରି bold କିମ୍ବା ଏଲ ବି ଡବ୍ଲୁ  ହେଉଥିଲେ  I   ଆଖି ଡୋଳା  ବାହାର କରି ଯେତେବେଳେ ଦେବାଶିଷ ଆଉଟ ପାଇଁ  ଅପିଲ ଲରୁଥିଲେ ସେତେବେଳେ ବ୍ୟାଟ୍ସମାନର ଅଧାରକ୍ତ ଶୁଖିଯାଉଥିଲା  I   ଯଦିଓ ଦେବାଶିଷ  ବିଶ୍ୱକପରେ ଭାରତପାଇଁ  ପ୍ରଥମ ପାଞ୍ଚ ଓଭରରେ  ୱେଇକେଟ ଅକ୍ତିଆର କରି ଭାରତୀୟ ଟିମକୁ ଲଢୁଆ ସ୍ଥିତିକୁ ଆଣୁଥିଲେ  ଭାରତୀୟ ଟିମ ଏହାର ଫାଇଦା ଉଠାଇ ପାରିନଥିଲା  I  ଦେବାଶିଷଙ୍କର ଚମତ୍କାର ପ୍ରଦର୍ଶନ ସତ୍ୱେ ବିଶ୍ୱ କପ ୧୯୯୯ ରେ ଭାରତ ସେମି ଫାଇନାଲରେ ପହଂଚି ପାରିନଥିଲା  I ଦେବାଶିଷଙ୍କର ବିଶ୍ୱ କପରେ ବୋଲିଂ ପ୍ରଦର୍ଶନ  କ୍ରିକେଟ ପ୍ରେମୀଙ୍କ ମନରେ ଏବେବି ଲିପିବଦ୍ଧ ହୋଇ ରହିଛି   I  ଦେବାଶିଷ ପାକିସ୍ତାନର ବ୍ୟାଟିଂ ପିଚରେ ଭଲ ପ୍ରଦର୍ଶନ ନକରିଥିବାରୁ ତାଙ୍କୁ ଟିମରୁ ବାହାରିବାକୁ ପଡିଲା  I     ପରେ ଦେବାଶିଷ ମହାନ୍ତିଙ୍କୁ ଅଷ୍ଟ୍ରେଲିଆ, ଇଂଲଣ୍ଡ ଓ ନିୟୁଜ଼ୀଲାଣ୍ଡର ଘାସ ପିଚରେ ଖେଳିବାକୁ ସୁଯୋଗ ମିଳି ନଥିଲା  I ସୁଯୋଗ ମିଳିଥିଲେ ସେ ଭାରତ ପାଇଁ ଅନେକ ଉଇକେଟ ଅକ୍ତିଆର କରି ଭାରତୀୟ ଟିମରେ ଲମ୍ବା ସମୟପାଇଁ ଖେଳି ପାରିଥାନ୍ତେ i   ଦେବାଶିଷ  ୪୫ ଓଡିଏଇ ଓ ଦୁଇଟି ଟେଷ୍ଟ ମ୍ୟାଚ ଖେଳି ୬୧ ଟି ଉଇକେଟ ଅକ୍ତିଆର କରିଛନ୍ତି  i  ଅଚାନକ ମୁମ୍ବାଇ ବୋଲର ଅଜିତ ଆଗାରକରଙ୍କ ଇଣ୍ଡିଆ ଟିମ ଭିତରେ ପ୍ରବେଶ ହେଲାପରେ ଦେବାଶିଷ ମହାନ୍ତିଙ୍କ ଭଳି ଏକ କ୍ରିକେଟ ପ୍ରତିଭାର ଅବସାନ ହେଲା I   ରଞ୍ଜୀବ , ଶିବ ସୁନ୍ଦର ଓ ଦେବାଶିଷ କ୍ରିକେଟ ଜଗତରେ ପ୍ରସ୍ପୁଟିତ ହେବା ପୂର୍ବରୁ ମଉଳି ଯାଇଥିଲେ  I  

ଏହି ତିନିଜଣଙ୍କ ପରେ ଓଡିଶା କ୍ରିକେଟରେ ମରୁଡି ପଡିଲା ଭଳି କୌଣସି ପ୍ରତିଭାବାନ ଖେଳାଳି ଭାରତୀୟ ଟିମରେ ସ୍ଥାନପାଇ ନଥିଲେ   I   ପରବର୍ତ୍ତୀ କାଳରେ ଓଡିଶାରେ କ୍ରିକେଟର ଭିତିଭୂମିର ବିକାଶ ହେଲାପରେ ମଧ୍ୟ ଓଡିଶା ଭାରତୀୟ ଟିମକୁ ଓ ଆଇପିଏଲ କୁ କୌଣସି ଆଖି ଦୃଶିଆ ଖେଳାଳି ଦେଇପାରିନି  I  ଦୁଃଖର କଥା ଯେତେବେଳେ ଅନ୍ୟ ରାଜ୍ୟର ଖେଳାଳିମାନେ ଆଇପିଏଲ, ଟେଷ୍ଟ ମ୍ୟଚ, ଓଡିଏଇ ଓ ଟି- 20 ଖେଳି କୋଟି କୋଟି ଟଙ୍କା କମାଇ ପାରୁଛନ୍ତି ସେତେବେଳେ ଓଡିଶାର ଯୁବ ଖେଳାଳିମାନେ ଏତେ ପ୍ରତିଭା ଥାଇ ମଧ୍ୟ ଆଗକୁ ବଢି ପାରୁନାହାନ୍ତି  I

ଓଡିଶାରେ କ୍ରିକେଟ ମରୁଡିକୁ ସମାପ୍ତ କରିବା ପାଇଁ ପ୍ରଥମେ ଖେଳାଳିମାନଙ୍କ ମନୋନୟନ ପ୍ରକ୍ରିୟାକୁ ସୁଧାରିବାକୁ ପଡିବ  I  ଖେଳାଳି ମନୋନୟନ କମିଟିରେ କେବଳ ବରିଷ୍ଠ ରଣଜୀ, ଜୋନ ଓ ଭାରତ ପାଇଁ ଖେଳିଥିବା ଖେଳାଳି  ରହିବା ଦରକାର   I   ଖେଳାଳି ବାଛିବା ପାଇଁ ବାହାର ରାଜ୍ୟରୁ ଭାରତ ପାଇଁ ଖେଳିଥିବା ପୂର୍ବତନ ଖେଳାଳିଙ୍କୁ ମଧ୍ୟ ସାମିଲ କରିବା ଦରକାର  I   ଓଡ଼ିଶାର ପ୍ରତିଷ୍ଠା, ସମ୍ମାନ ଓ ଗାରିମା ସର୍ବୋପରି ହେବା ଉଚିତ  i  ଚୟନକର୍ତ୍ତାମାନେ ଓ ଓସିଏର କାର୍ଯ୍ୟକର୍ତ୍ତା ଓଡ଼ିଶାର ସମ୍ମାନକୁ ଆଖିଆଗରେ ରଖି  ପ୍ରିୟା ପ୍ରୀତି ତୋଷଣ, ନିଜ ପର ଭାବ, ମୋ ଟିମ ତା ଟିମ, ମୋ ପିଲା ତା ପିଲା, ମୋ ଜିଲା ତା  ଜିଲା, ମୋ ଭାଇ ତା ଭାଇ, ମୋ ସହର ତା ସହର, ଜାତି, ଧର୍ମ ଓ ବ୍ୟକ୍ତିଗତ ସମ୍ପର୍କରୁ ଉପରେ ରହି ଖେଳାଳିମାନଙ୍କୁ ଚିହ୍ନଟ କରିବା ଦରକାର  I  ଯଦି କୌଣସି ଯୁବ ଖେଳାଳି ପ୍ରତିଭା ଥାଇ ମଧ୍ୟ ଫୁଲ ଫୁଟିବା ପୂର୍ବରୁ ମଉଳି ଯାଏ ତେବେ ଏହା ରାଜ୍ୟପାଇଁ ହାନିକାରକ I  ଚୟନ ପ୍ରକ୍ରିୟାରେ ସମ୍ପୂର୍ଣ୍ଣ ସ୍ୱଛତା ରହିବା ନିହାତି ଜରୁରୀ i  ଚୟନ ପ୍ରକ୍ରିୟାର ଭିଡ଼ିଓ ରେକର୍ଡିଙ୍ଗ ଓ ଚୟନକର୍ତ୍ତାର ପର୍ଯ୍ୟବେକ୍ଷଣ ରିପୋର୍ଟ ଓସିଏ ପାଖରେ ମହଜୁଦ ରହିବା ଦରକାର  I  ଏବେ ଗୋଟେ ରଣଜୀ ଟ୍ରଫି ମ୍ୟାଚ ଖେଳିବା ପାଇଁ ଖେଳାଳିକୁ ୨୦୦୦୦୦ ଟଙ୍କା ମିଳୁଛି  I  ଅନେକ ରାଜ୍ୟରେ ରଣଜୀ ଟ୍ରଫି ଖେଳିବା ପାଇଁ  ସାଧାରଣ ଖେଳାଳି ମଧ୍ୟ ଟଙ୍କା ଦେଇ ଟିମରେ ସାମିଲ ହେଉଥିବାର ଖବର ମିଳୁଛି  I  ଅର୍ଥ ଓ ପ୍ରଭାବ ଦ୍ୱାରା ଯଦି କିଏ ଟିମ ଭିତରେ ସ୍ଥାନପାଏ ତେବେ ଏହା କ୍ରିକେଟ ଖେଳର  ଭବିଷ୍ୟତକୁ ଅନ୍ଧକାର କରିଦେଇଥାଏ  I   ଖେଳକୁ  ରାଜନୀତି ଓ ଅର୍ଥର ପ୍ରଭାବରୁ ବଞ୍ଚାଇବା ପାଇଁ ସରକାର, ଗଣ ମାଧ୍ୟମ, ବରିଷ୍ଠ ଖେଳାଳି  ଓ ଖେଳପ୍ରେମୀ ପଦକ୍ଷେପ ନେବା ଉଚିତ  I  

ଓଡ଼ିଶାରେ ଅଭିଜ୍ଞ କୋଚର ନିହାତି ଜରୁରୀ ଅଛି  i  ଓସିଏ ଏଥିପାଇଁ ଭାରତ ପାଇଁ ଖେଳିଥିବା ଅନୁଭବୀ ଖେଳାଳି କିମ୍ବା ଅଭିଜ୍ଞ ବିଦେଶୀ କୋଚ ନିଦ୍ଧିଷ୍ଟ ସମୟ ପାଇଁ ବିନିଯୋଗ କରିବା ଦରକାର  I  ଯୁବ ଖେଳାଳିଙ୍କୁ ଫୁଟୱାର୍କ ଓ ବୋଲିଂ ଶୈଳୀ ଠିକ ଭାବରେ ଶିଖାଇବା ଉଚିତ  I   ଭୁଲ ଶୈଳୀ ଶିଖିଗଲେ ଖେଳାଳିକୁ ଜୀବନସାରା ପାସ୍ତାଇବାକୁ ପଡେ   I  କ୍ରିକେଟର ବିକାଶ ପାଇଁ ଅବସର ନେଇଥିବା ଅନୁଭବୀ ଖେଳାଳି ଆଗକୁ ଆସିବା ଦରକାର  I   ଯୁବ କ୍ରିକେଟ ପ୍ରତିଭାର ସନ୍ଧାନ ସାରା ଓଡ଼ିଶାରେ ହେବା ଦରକାର I ଏଥିପାଇଁ କ୍ରିକେଟ ଉପରେ ଗଭୀର ଜ୍ଞାନ ଥିବା ଅନୁଭବୀ ଓ  ସଚ୍ଚୋଟ ଖେଳାଳିଙ୍କୁ ବିନିଯୋଗ କରିବା ଉଚିତ   I       

ରାଜ୍ୟର ପ୍ରତ୍ୟେକ ଜିଲାରେ କ୍ରିକେଟ ପ୍ରତିଭାର ବିକାଶ ପାଇଁ ଖେଳାଳିଙ୍କୁ ସାର୍ବଜନୈକ ଖେଳ ପଡିଆ ଉପଲବ୍ଧ ହେବା  ଉଚିତ  I  ପ୍ରତିଭାବାନ ଖେଳାଳି ଯେକୌଣସି ପରିବାରରୁ ଯଥା ଧନୀ, ଗରିବ ଓ ମଧ୍ୟବିତ ପରିବାରରୁ ମଧ୍ୟ ଆସିପାରେ  I  ଯଦି କ୍ରିକେଟ ଖେଳିବା ବ୍ୟୟବହୁଳ ହେବ ତେବେ ରାଜ୍ୟ ଅନେକ ଗରିବ ଓ ମଧ୍ୟବିତ ପରିବାରର ପ୍ରତିଭାବାନ ଖେଳାଳିଙ୍କୁ ହରାଇବ I  କ୍ରିକେଟ ଖେଳ ଯଦି ଧନୀ ଓ ପ୍ରଭାବଶାଳି ଲୋକଙ୍କ ପିଲାଙ୍କ ପାଇଁ  ଉଦ୍ଦିଷ୍ଟ ହେବ ତେବେ ରାଜ୍ୟରେ କ୍ରିକେଟର  ବିକାଶ କେବେବି ହେବ ନାହିଁ  I  ରାଜ୍ୟର ସବୁ ବର୍ଗର ପିଲାମାନେ ଯେପରି କ୍ରିକେଟ ଖେଳିବାପାଇଁ ସୁବିଧା ପାଇବେ ସେଥିପାଇଁ ସରକାର, ଘରୋଇ କମ୍ପାନୀ , ବ୍ୟବସାୟ ସଂସ୍ଥା, ବରିଷ୍ଠ ନାଗରିକ, ଧନୀ ଲୋକେ, ଗଣ ମାଧ୍ୟମ, ପୂର୍ବତନ ଖେଳାଳି ଓ କ୍ରିକେଟ ପ୍ରେମୀ ଆଗେଇ ଆସିବା ଉଚିତ  I  କ୍ରିକେଟ ଖେଳାଳିମାନଙ୍କୁ ସରକାରୀ ଓ ବେସରକାରୀ ଅଫିସରେ ନିଯୁକ୍ତି ଦେବା ଉଚିତ  I  ଖେଳାଳିମାନେ ଯେପରି  ନିଜ ଗୋଡ଼ରେ ନିଜ ଜୀବିକା ନିର୍ବାହ କରିପାରିବେ ସେଥିପାଇଁ ଭିତ୍ତିଭୂମି ତିଆରି ହେବା ଦରକାର  I  ଚାକିରୀ କଲାପରେ ଖେଳାଳିମାନେ ଖେଳର ଗୁଣାତ୍ମକ ମାନକୁ ବଞ୍ଚାଇ ରଖିବା ଉଚିତ I  ଓଡିଶାର  ଖେଳାଳି ଟିମ ଇଣ୍ଡିଆରେ ଭର୍ତ୍ତି ହେବା ପାଇଁ ସରକାର ଓ ଖେଳପ୍ରେମୀ ଉଦ୍ୟମ କରିବା ଦରକାର  I  ଯଦି ଓଡ଼ିଆ ଖେଳାଳିମାନେ  ଟିମ ଇଣ୍ଡିଆରେ ସ୍ଥାନପାଇ ଭଲ ପ୍ରଦର୍ଶନ କରିବେ ତେବେ ଏହା ସମସ୍ତ ଓଡିଶାବାସୀଙ୍କପାଇଁ ଗର୍ବର ବିଷୟ ହେବ I   କେତେ ଦିନ ଆମେ ଅନ୍ୟର ଖେଳ ଦେଖି ତାଳି ମାରିବା ? ଚକ ଦେ ଓଡିଶା !