ରିପୋର୍ଟିଂ ଦକ୍ଷତା ରାଜ୍ୟର ସାମୁହିକ ବିକାଶ କରିବ
(Published in Odisha Bhaskar on 17.12.2022)ଓଡ଼ିଶାର ସାମାଜିକ, ସାଂସ୍କୃତିକ ଓ ଆର୍ଥିକ ବିକାଶ ପାଇଁ ଗଣ ମାଧ୍ୟମର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ I
ଯଦି ଗଣମାଧ୍ୟମ ଏହି ଭୂମିକାକୁ ଠିକ ଭାବରେ ସମ୍ପାଦନ କରିନଥାଏ ତେବେ ରାଜ୍ୟର ବିକାଶ ଗୋଦର ଗୋଡ଼ରେ ମାଂସ ଲାଗିଲା ଭଳି ହୋଇଥାଏ I ଏହି ବିକାଶ ପ୍ରକ୍ରିୟାରୁ ଅଳ୍ପ କେତେଜଣ ମୁଷ୍ଟିମେୟ ଲୋକ ଫାଇଦା ଉଠାଇ ଥାନ୍ତି I ରାଜ୍ୟରେ ଯଦି ସାମୁହିକ ବିକାଶ ନହୁଏ ତେବେ ବିକାଶର ଉଦେଶ୍ୟ ସାଧନ ହୋଇ ନଥାଏ I ରାଜ୍ୟରେ ସାମୁହିକ ବିକାଶ କରିବା ରାଜନେତା, ଶିକ୍ଷିତ ଯୁବପିଢ଼ି, ବୁଦ୍ଧିଯିବି, ସରକାରୀ, ସ୍ଵୟଂସେବୀ ଓ ଘରୋଇ ସଂସ୍ଥା ମାନଙ୍କର କର୍ତବ୍ୟ I ଗଣମାଧ୍ୟମର ସହାୟତାରେ ହିଁ ସାମୁହିକ ବିକାଶ ସମ୍ଭବ ହୋଇଥାଏ କାରଣ ତୃଣମୂଳ ସମସ୍ୟାର ରିପୋର୍ଟିଂ ରାଜ୍ୟବାସୀଙ୍କୁ ମାର୍ଗଦର୍ଶନ କରିବାରେ ସହାୟତା କରେ I ରିପୋର୍ଟିଂ ଯେତେ ସ୍ଵଛ, ସରଳ ଓ ଯୁକ୍ତିଯୁକ୍ତ ହେବ ଏହାର ଉପକାରିତା ଓ ସମାଜ ଉପରେ ପ୍ରଭାବ ସେତେ ଅଧିକ ହୋଇଥାଏ I ପାଞ୍ଚୋଟି Ws ଯଥା "କିଏ, କଣ, କାହିଁକି, କୋଉଠି ଓ କେତେବେଳେ" ର ବିଶ୍ଳେଷଣ ସାଧାରଣ ଲୋକଙ୍କୁ ସଚେତନ କରିଥାଏ I ଗଣ ମାଧ୍ୟମର ରିପୋର୍ଟିଂ ଦକ୍ଷତା ରାଜ୍ୟବାସୀଙ୍କୁ ରାଜ୍ୟର ପ୍ରକୃତ ଆର୍ଥିକ, ସାମାଜିକ ଓ ରାଜନୈତିକ ସ୍ଥିତି ବିଷୟରେ ଅବଗତ କରାଇଥାଏ I ଗଣ ମାଧ୍ୟମର ସ୍ଵଛ ଓ ସାହସିକ ରିପୋର୍ଟିଂ ପାଇଁ ସମାଜରେ ଉପକୂଳ ବାତାବରଣ ତିଆରି ହେବା ନିହାତି ଜରୁରୀ I ସାମ୍ବାଦିକ ମାନଙ୍କୁ ସୁରକ୍ଷା ଓ ସହଯୋଗ ଦିଆଗଲେ ସେମାନେ ରିପୋର୍ଟିଂର ଗୁଣାତ୍ମକ ମାନକୁ ବୃଦ୍ଧି କରି ରାଜ୍ୟର ବିକାଶ କରିଥାନ୍ତି I
ଦେଶରେ ଶିଳ୍ପ ବିକାଶ ପାଇଁ ଓଡିଶା ଅନେକ ଖଣିଜ ପଦାର୍ଥ ଯୋଗାଇଥାଏ I ଖଣିଜ ପଦାର୍ଥ ଯୋଗାଇବା ଦ୍ୱାରା ପରିବେଶର ମଧ୍ୟ ଅନେକ କ୍ଷତି ହୋଇଥାଏ I ପାହାଡ଼, ପର୍ବତ, ଜଙ୍ଗଲ ଓ ଭୂତଳ ଜଳ ନଷ୍ଟ ହେବା ସଂଗେ ସଂଗେ ପରିବେଶର ତାପମାତ୍ରା ବଢିଥାଏ I ବଂଚିବା ପାଇଁ ମଣିଷ ପୂର୍ବ କାଳରୁ ଖଣିଜ ପଦାର୍ଥର ବ୍ୟବହାର ଜାଣିଥିଲା I ଆଜି ଲୋଭ ବିକାର ଗ୍ରସ୍ତ ମନୁଷ୍ୟ ଅତ୍ୟଧିକ ମାତ୍ରାରେ ଖଣିଜ ପଦାର୍ଥ ପୃଥିବୀ ଗର୍ଭରୁ ବାହାର କରୁଥିବାରୁ ଅଧିକାଂଶ ଲୋକଙ୍କର ଜୀବନ, ଜୀବିକା ଓ ସ୍ୱାସ୍ଥ୍ୟରେ ହାନି ହେଉଛି I ପର୍ଯାବରଣର ଅବନତି ହେବା ଫଳରେ ସାରା ବିଶ୍ୱରେ ମହାମାରୀ, ଭୁକମାରି ଓ ଅସ୍ୱାଭାବିକ ଭାବରେ ହେଉଥିବା ପ୍ରାକୃତିକ ବିପର୍ଯ୍ୟୟ ଦ୍ୱାରା ଧନ ଜୀବନ ନଷ୍ଟ ହେଉଛି I ଖଣିଜ ପଦାର୍ଥର ଉତ୍ପାଦନ କଲାବେଳେ ଏହା ଯେପରି ପ୍ରକୃତିର ସନ୍ତୁଳନ ନଷ୍ଟ ନକରିବ ଏଥି ପାଇଁ ସମସ୍ତ ପଦକ୍ଷେପ ନେବା ଉଚିତ I ଖଣିଜ ପଦାର୍ଥର ଉତ୍ପାଦନ, ଉପକାରିତା ଓ ଏହାର ପ୍ରକୃତି ଓ ମନୁଷ୍ୟ ଉପରେ ପ୍ରଭାବ ଗଣମାଧ୍ୟମ ସାଧାରଣ ଲୋକଙ୍କୁ ଅବଗତ କରାଇବା ଦରକାର I
ପର୍ଯାବରଣର ଅବନତି
ଦେଶର ଶିଳ୍ପ ବିକାଶ ପାଇଁ ଓଡିଶାର ଅବଦାନ ଅତୁଳନୀୟ I ଏତେ ଅବଦାନ ଥାଇ ଓଡିଶାରୁ ଆଜି ଲକ୍ଷ ଲକ୍ଷ ଶିକ୍ଷିତ, ଅଶିକ୍ଷିତ ଓ ଅର୍ଧ ଶିକ୍ଷିତ ଯୁବପିଢ଼ି ଭାରତର ଅନ୍ୟାନ୍ୟ ରାଜ୍ୟ ଓ ବିଦେଶକୁ ରୋଜଗାରପାଇଁ ଚାଲିଯାଉଛନ୍ତି I ଓଡ଼ିଆ ଶିକ୍ଷିତ ପରିବାର ଗୋଟିଏ ଦୁଇଟି ସନ୍ତାନ କରୁଛନ୍ତି I ସମସ୍ତେ ବାହାରକୁ ଚାଲିଗଲା ପରେ ବୁଢା ବୁଢ଼ୀ ମାନେ ନିଜ ଘରେ ପଡିରହୁଛନ୍ତି କିମ୍ବା ପିଲାଙ୍କ ପାଖକୁ ଚାଲି ଯାଉଛନ୍ତି I ପିଲାମାନେ ନନେଲେ ଵୃଦ୍ଧାଶ୍ରମ ଖୋଜିବାକୁ ପଡୁଛି I ଆଜି କଟକ, ଭୁବନେଶ୍ୱର, ପୁରୀ ଓ ରାଉରକେଲା ଇତ୍ୟାଦି ସହର ଗୁଡିକରେ ପୈତୃକ ଘରଗୁଡିକ ଖାଲି ପଡିଛି କିମ୍ବା ବିକ୍ରି ହୋଇଯାଉଛି I ଏହି ପରିସ୍ଥିତି ଯଦି ବେଶିଦିନ ଚାଲେ ତେବେ ଓଡିଶାରେ ଆଉ ଶିକ୍ଷିତ ଓଡ଼ିଆ ପରିବାର ରହିବେ ନାହିଁ I ଏହି ଉତ୍କଟ ସାମାଜିକ ପରିସ୍ଥିତିକୁ ସୁଧାରିବାପାଇଁ ଓଡ଼ିଶାରେ ସମସ୍ତ ଆର୍ଥିକ ସେକ୍ଟରଗୁଡିକରେ ଓଡିଶାବାସୀଙ୍କ ପାଇଁ ରୋଜଗାର ସୃଷ୍ଟି ହେବା ଦରକାର I ଗଣ ମାଧ୍ୟମ ସମସ୍ତ ଆର୍ଥିକ ସେକ୍ଟରର ତୃଣ ମୂଳ ସମସ୍ୟାକୁ ଅନୁଧ୍ୟାନ କରି ରିପୋର୍ଟ ପ୍ରସ୍ତୁତ କରିବା ଉଚିତ I ଓଡ଼ିଶାରେ ଓଡ଼ିଆ କାହିଁକି ରୋଜଗାର ପାଉନାହାନ୍ତି ଏହାର ବିଶ୍ଳେଷଣ ହେବା ଉଚିତ I
ସବୁଠାରୁ ବଡ ସମସ୍ୟା ହେଲା ଓଡ଼ିଶାରେ ଯେଉଁ ଯୁବପିଢ଼ି ମୁମ୍ବାଇ, ହାଇଦ୍ରାବାଦ, ପୁନେ, ଅହମଦାବାଦ, ପଂଜାବ ଓ କର୍ଣ୍ଣାଟକ ରାଜ୍ୟଗୁଡିକୁ ରୋଜଗାର ପାଇଁ ଯାଉଛନ୍ତି ସେମାନେ ଦ୍ରୁତ ଟ୍ରେନ ସୁବିଧା ନଥିବାରୁ ଜରୁରୀ କାଳୀନ ପରିସ୍ଥିତିରେ ଘରକୁ ଆସିପାରୁନାହାନ୍ତି I ହାଇଦ୍ରାବାଦର ଗଳି କନ୍ଦିରେ ଓଡ଼ିଆ ଲୋକ ରହୁଛନ୍ତି କିନ୍ତୁ ଓଡିଶା ଆସିବାକୁ ସେମାନଙ୍କୁ ତିନିମାସ ଆଗରୁ ରେଳ ଟିକେଟ କରିବାକୁ ପଡୁଛି I ଉଡ଼ାଜାହାଜରେ ଓଡିଶା ସିଧା ଆସିବା ପାଇଁ ଜଣକୁ ୮୦୦୦ ରୁ ୧୨୦୦୦ ଟଙ୍କା ଲାଗୁଛି I ଲୋକେ ଯଦି ଗମନା ଗମନରେ ଏତେ ଅଧିକ ଖର୍ଚ୍ଚ କରିବେ ତେବେ ସେମାନଙ୍କ ସାମୁହିକ ବିକାଶ ହେବା କଷ୍ଟକର I ଟ୍ରେନ ତତ୍କାଳ ଟିକେଟ ଦଲାଲମାନଙ୍କ ମାଧ୍ୟମରେ ହୋଇପାରୁଛି I ସାଧାରଣ ଲୋକ ତତ୍କାଳ ଟିକେଟ ପାଇଁ ୱେବସାଇଟ ଖୋଲିବାର ଦୁଇ ମିନିଟ ଭିତରେ ତତ୍କାଳ ଟିକେଟ ସରି ଯାଉଛି I ଆଜି ଓଡିଶାରୁ ରେଳରେ ହାଇଦ୍ରାବାଦ ଯିବା ପାଇଁ ୧୦୯୧ କିଲୋମିଟର ରାସ୍ତାକୁ ପ୍ରାୟ ୨୪ ଘଣ୍ଟା ଲାଗୁଛି I ହାଇଦ୍ରାବାଦରୁ ଓଡିଶାକୁ ଦ୍ରୁତଗାମୀ ଡୁରଣ୍ଟ ଟ୍ରେନର ନିହାତି ଆବଶ୍ୟକତା ଅଛି I ଓଡ଼ିଶାର ଏତେ ନେତା କେନ୍ଦ୍ରରେ ଥିଲେ ମଧ୍ୟ ଓଡିଶାରୁ ହାଇଦ୍ରାବାଦ, ପୁନା ଓ ମୁମ୍ବାଇ ଯିବା ପାଇଁ ଦ୍ରୁତ ଟ୍ରେନ ସୁବିଧା ଆଣିପାରୁନାହାନ୍ତି I ତିରିଶ ବର୍ଷ ତଳେ ଭୁବନେଶ୍ୱରରୁ ମୁମ୍ବାଇ ଯିବାପାଇଁ କୋଣାର୍କ ଏକ୍ସପ୍ରେସକୁ ୩୨ ଘଣ୍ଟା ଲାଗୁଥିଲା ଆଜି ଏହି ଟ୍ରେନକୁ ୩୭ ଘଣ୍ଟା ଲାଗୁଛି I ଦ୍ରୁତ ରେଳ ସୁବିଧା କୋଉ ରାଜ୍ୟକୁ ମେଞ୍ଚେ ତୋ ଓଡିଶା ଭଳି ରାଜ୍ୟକୁ କେଂଚେ ମିଳୁଛି I ଓଡିଶାବାସୀଙ୍କ ଆର୍ଥିକ ବିକାଶ ପାଇଁ ଦରକାର ଦେଶର ବଡ ବଡ ନଗରଗୁଡିକ ସହିତ ଦ୍ରୁତ ଟ୍ରେନ ଯୋଗାଯୋଗ ବ୍ୟବସ୍ଥା I
କଳା କ୍ଷତ୍ରରେ ରିପୋର୍ଟିଂ ଦକ୍ଷତା ନଥିବାରୁ ଆଜି ଓଡ଼ିଶାର ଅନେକ ଉର୍ଣ୍ଣତ ହସ୍ତଶିଳ୍ପ ପରମ୍ପରା ଲୋପ ପାଇବାକୁ ବସିଲାଣି I କଟକର ବିଶ୍ୱ ବିଖ୍ୟାତ ତାରକସି ଓ ସିଂହ କାମର ଭଲ କାରିଗର ଆଉ ନାହାନ୍ତି I ମଙ୍ଗଳାବାଗରେ ରହୁଥିବା ସିଂହ କାରିଗର ମାନେ ପ୍ରାୟ କାମ ଛାଡିଦେଲେଣି I ଅଳ୍ପ କେତେଜଣଙ୍କୁ ଛାଡିଦେଲେ ରୁପା ତାରକସି କାମ ଆଉ କେହି କରୁନାହାନ୍ତି I ରାଜ୍ୟ ବାହାରୁ ରୁପା ତାରକସି ଓ ସିଂହକାମ ଅଣାଯାଇ କଟକରେ ବିକ୍ରି କରାଯାଉଛି I କଟକର ମୂର୍ତ୍ତିକାଶିଳ୍ପ ପରମ୍ପରା ପ୍ରାୟ ଲୋପ ପାଇ ଗଲାଣି I ପଚାଶ ବର୍ଷ ତଳେ କଟକର ମୂର୍ତିକାମ ସାରା ଭାରତରେ ପ୍ରସିଦ୍ଧ ଥିଲା I ଆଜି ମୂର୍ତ୍ତିକା କାମର ସେ ଯାଦୁକରୀ ସ୍ପର୍ଶ ଆଉ ନାହିଁ I
ଓଡ଼ିଶାର ଅନେକ ଉର୍ଣ୍ଣତ ହସ୍ତଶିଳ୍ପ ପରମ୍ପରା ଲୋପ ପାଇବାକୁ ବସିଲାଣି
ଓଡ଼ିଶାରେ ଥିବା ପ୍ରାଚୀନ ମନ୍ଦିର ଗୁଡିକର ପରିବେଶ ନଷ୍ଟ ହୋଇଯିବା ଫଳରେ ଓଡ଼ିଶାର ଆଧ୍ୟାତ୍ମିକ ପରିବେଶରେ ଅନେକ ଅବନତି ଦେଖାଦେଇଛି I ପ୍ରାଚୀନ ମନ୍ଦିର ଗୁଡିକର ଆଧ୍ୟାତ୍ମିକ ପରିବେଶକୁ ସୁଧାରିବା ପାଇଁ ସମସ୍ତ ପଦକ୍ଷପ ନିଆଯିବା ଦରକାର I ଶ୍ରଦ୍ଧାଳୁମାନଙ୍କ ସଂଖ୍ୟା ବଢିଲେ ରୋଜଗାର ସୃଷ୍ଟି ହେଵ I ସୁରକ୍ଷାର ଅଭାବରୁ ଅନେକ ପ୍ରାଚୀନ ମନ୍ଦିରଗୁଡିକୁ ତୀର୍ଥଯାତ୍ରୀମାନେ ଯିବାକୁ ସାହସ କରୁନାହାନ୍ତି I ଫଳରେ ପର୍ଯ୍ୟଟନ କ୍ଷତ୍ରର ଅନେକ କ୍ଷତି ହେଉଛି I ତୀର୍ଥ ପର୍ଯ୍ୟଟନର ବିକାଶ ପାଇଁ ଗଣମାଧ୍ୟମ ତୃଣମୂଳ ସ୍ଥରର ସମସ୍ୟାକୁ ନିୟମିତ ଭାବରେ ଲୋକଲୋଚନକୁ ଆଣିବା ଦରକାର I ତୀର୍ଥପର୍ଯ୍ୟଟନ ଭଳି କୃଷି କ୍ଷତ୍ରର ରିପୋର୍ଟିଂର ଗୁଣାତ୍ମକ ମାନରେ ଉର୍ନ୍ନତି ହେଲେ ଓଡ଼ିଶାରେ ସରକାରଙ୍କ କୃଷି ସମ୍ବଧିତ ସୁବିଧା ଓ କୃଷି ଋଣର ଉପଯୁକ୍ତ ବିନିଯୋଗ ହୋଇପାରିବ I ଯୁବଚାଷୀମାନେ ଚାଷ ପ୍ରତି ଆକୃଷ୍ଟ ନହେବାର କାରଣର ସମୀକ୍ଷା ହେବା ନିହାତି ଦରକାର I
କୋଣାର୍କ ମନ୍ଦିରର ସୁରକ୍ଷା ଦରକାର
ଭୁବନେଶ୍ୱର ଭାରତର ସବୁଠାରୁ ସୁନ୍ଦର ସହରଗୁଡିକ ଭିତରୁ ଗୋଟିଏ I ହାଇଦ୍ରାବାଦ, ଚେନ୍ନାଇ, ପୁନା, ମୁମ୍ବାଇ ଓ ବାଙ୍ଗାଲୋର ଭୁବନେଶ୍ୱରର ସୌନ୍ଦର୍ୟ ସଂଗେ ତୁଳନା କରିହେବ ନାହିଁ I ଉତ୍ତମ ଓ ପ୍ରସସ୍ଥ ରାସ୍ତା, ସବୁଜିମା, ଫୁଟପାଥ, ପାର୍କ ଓ ଭେଣ୍ଡିଙ୍ଗ ଜୋନ ଅନ୍ୟ କୌଣସି ସହରରେ ଦେଖାଯାଏ ନାହିଁ I କିନ୍ତୁ ଏହି ସୁନ୍ଦର ସହରକୁ ନଷ୍ଟ ହେବାକୁ ବେଶୀ ସମୟ ଲାଗିବ ନାହିଁ ଯଦି ଓଡ଼ିଶାର ଗ୍ରାମାଞ୍ଚଳରେ ରୋଜଗାରର ସୁବିଧା ସୃଷ୍ଟି ନହୁଏ I ପ୍ରତିଦିନ ହଜାର ହଜାର ଲୋକ ଓଡ଼ିଶାର ଗାଁ ଗହଳରୁ ଓ ପଡୋଶୀ ରାଜ୍ୟରୁ ଭୁବନେଶ୍ୱର ଓ କଟକକୁ ରୋଜଗାର ପାଇଁ ଆସୁଛନ୍ତି I ସହର ଗୁଡିକରେ ଝୋପଡ଼ପଟି ବଢିବାର ଏହା ମୁଖ୍ୟ କାରଣ I ଗଣମାଧ୍ୟମ ଗାଁ ଗୁଡିକରେ ଏତେ ଅର୍ଥ ବିନିଯୋଗ ହେଲାପରେ ରୋଜଗାର କାହିଁକି ସୃଷ୍ଟି ହେଉନାହିଁ ଏହାର ତୃଣ ମୂଳ ତଥ୍ୟ ଲୋକଲୋଚନକୁ ଆଣିବା ଦରକାର I ଓଡ଼ିଶାରେ ଏତେ ପ୍ରାକୃତିକ ସମ୍ପଦ, ବୁଦ୍ଧି, କୌଶଳ, ହସ୍ତ ଶିଳ୍ପ ପରମ୍ପରା ଓ ସାମର୍ଥ୍ୟ ଥିବା ସତ୍ୱେ ଓଡ଼ିଶାରେ ସାମୁହିକ ବିକାଶ ନହେବା ଏକ ବିଡମ୍ବନା I ଓଡ଼ିଶାର ସାମୁହିକ ବିକାଶ ଓ ଯୁବପିଢିଙ୍କର ଭବିଷ୍ୟତ ଗଣ ମାଧ୍ୟମର ଗୁଣାତ୍ମକ ରିପୋର୍ଟିଂ ଉପରେ ଅନେକାଂଶରେ ନିର୍ଭର କରେ I
