ଓଡିଶାରେ ମାନବ ବିକାଶର ଆବଶ୍ୟକତା ଅଛି
(Published in Odisha Bhaskar on 18.10.2022)
ଯେକୌଣସି ଦେଶ ଓ ରାଜ୍ୟର ସାମୁହିକ ବିକାଶ ମାନବ ବିକାଶ ଉପରେ ସମ୍ପୂର୍ଣ ନିର୍ଭର କରିଥାଏ I ମାନବ ବିକାଶର ଅର୍ଥନୁହେଁ କୋର୍ଟ- ପ୍ୟାଣ୍ଟ -ଟାଇ ପିନ୍ଧା ଇଂରାଜୀ କହୁଥିବା ଯୁବପିଢ଼ି I ମନୁଷ୍ୟର ଶାରୀରିକ, ମାନସିକ, ବୌଦ୍ଧିକ ଓ ଆଧ୍ୟାତ୍ମିକ ବିକାଶହିଁ ରାଜ୍ୟର ପ୍ରକୃତ ବିକାଶ କରିଥାଏ I ଯଦି ଯୁବପିଢିଙ୍କ ଭିତରେ ଏହି ଗୁଣଗୁଡିକର ବିକାଶ ହୋଇପାରିବ ତେବେ ଓଡ଼ିଶାର ରାଜନୈତିକ, ଆର୍ଥିକ ଓ ସାମାଜିକ କ୍ଷେତ୍ରରେ ଗୁଣାତ୍ମକ ପରିବର୍ତ୍ତନ ଦେଖାଦେବ I
ମାନସିକତାର ପରିବର୍ତ୍ତନ ଉପର ସ୍ତରରୁ ହେଲେ ଏହାର ପ୍ରଭାବ ସାଧାରଣ ଲୋକଙ୍କ ଉପରେ ଶୀଘ୍ର ପଡିଥାଏ I ନିଜ ପ୍ରଜାଙ୍କର ମାନସିକତାକୁ ରକ୍ଷା କରିବା ପାଇଁ ତ୍ରେତୟା ଯୁଗରେ ଭଗବାନ ରାମ ବିନାଦୋଷରେ ଦେବୀ ସୀତାଙ୍କୁ ବନବାସ ଦେଇଥିଲେ I ଭାରତର ପୂର୍ବତନ ପ୍ରଧାନ ମନ୍ତ୍ରୀ ସ୍ବର୍ଗୀୟ ଲାଲ ବହାଦୁର ଶାସ୍ତ୍ରୀ ମାତ୍ର ଦୁଇ ବର୍ଷ ଶାସନ କାଳରେ ଯେଉଁ ଆଦର୍ଶ ସୃଷ୍ଟି କରିଥିଲେ ତାହା ଭାରତବାସୀ ସବୁଦିନ ପାଇଁ ମନେରଖିବେ I ଲାଲ ବହାଦୁର ଶାସ୍ତ୍ରୀଙ୍କର ରାଷ୍ଟ୍ରଭକ୍ତି , ଦୃଢନିଶ୍ଚୟ, କାର୍ଯ୍ୟ କୁଶଳତା, ବୁଦ୍ଧି, ସାହସ, ତୃଣମୂଳ ସ୍ଥରର ଅଭିଜ୍ଞତା ଓ ନୈତିକତା ଭାରତକୁ ଏକ ଶକ୍ତିଶାଳୀ ରାଷ୍ଟ୍ରରେ ପରିଣତ କରିବାକୁ ଯାଉଥିଲା I ଯଦି ଲାଲ ବହାଦୁର ଶାସ୍ତ୍ରୀ ଦଶ ବର୍ଷ ପ୍ରଧାନ ମନ୍ତ୍ରୀ ରହିଥାନ୍ତେ ତେବେ ଭାରତ କେବେଠାରୁ ଏକ ବିକଶିତ ରାଷ୍ଟ୍ର ହୋଇପାରିଥାନ୍ତା I ଓଡ଼ିଶାର ବିଭିର୍ଣ୍ଣ କ୍ଷେତ୍ର ଯଥା ଶିକ୍ଷା, ସଂସ୍କୃତି, ବ୍ୟାଙ୍କ, ସରକାରୀ ଦପ୍ତର, କୃଷି, ରାଜନୀତି, ଖେଳକୁଦ, ଗଣମାଧ୍ୟମ ଓ ଧାର୍ମିକ ଅନୁଷ୍ଠାନ ଇତ୍ୟାଦିରେ କାର୍ଯ୍ୟରତ ଦୃଢ଼ମନା, ସଚୋଟ ଓ ସକାରାତ୍ମକ ବିଚାର ଥିବା ବ୍ୟକ୍ତିମାନେ ନିଜ ନିଜ କ୍ଷେତ୍ରର ନେତୃତ୍ୱ ନେଲେ ଏହା ରାଜ୍ୟରେ ମାନବ ବିକାଶ ପାଇଁ ପ୍ରେରଣା ଯୋଗାଇବ I
ଯୁବପିଢିଙ୍କ ଭିତରେ ଶିକ୍ଷାର ବିକାଶ ପାଇଁ ସରକାର ପ୍ରଥମେ ରାଜ୍ୟରେ ଥିବା ସମସ୍ତ ସରକାରୀ ଓ ବେସରକାରୀ ସ୍କୁଲ ଗୁଡିକର ଗୁଣାତ୍ମକ ମାନକୁ ବୃଦ୍ଧି କରିବା ଦରକାର I ରାଜ୍ୟ ଶିକ୍ଷା ରିପୋର୍ଟ ଇଣ୍ଡିଆ (State of the Education Report for India) ରେ ଦର୍ଶା ଯାଇଛି ଓଡ଼ିଶାର ସ୍କୁଲ ଗୁଡିକରେ ୨୮୮୧୬ ଶିକ୍ଷକ ଚାକିରୀ ଖାଲି ପଡିଛି I ସରକାର ପ୍ରଥମେ ଯୋଗ୍ୟତା ଓ ସମ୍ପୂର୍ଣ୍ଣ ସ୍ୱଛତା ଭିତ୍ତିରେ ନୂତନ ଶିକ୍ଷକମାନଙ୍କୁ ନିଯୁକ୍ତି ଦେବା ଉଚିତ I ଓଡ଼ିଶାର ସରକାରୀ ସ୍କୁଲ ଗୁଡିକରେ ପାଠପଢା ଉଚ୍ଚକୋଟିର ହେଉନଥିବାରୁ ଅଭିଭାବକମାନେ ପିଲାମାନଙ୍କୁ ଘରୋଇ ବିଦ୍ୟାଳୟରେ ପଢାଇବାକୁ ବାଧ୍ୟ ହେଉଛନ୍ତି I ସରକାରୀ ବିଦ୍ୟାଳୟଗୁଡିକର ଗୁଣାତ୍ମକ ମାନ ବୃଦ୍ଧି କରାଗଲେ ଅଭିଭାବକମାନେ ପିଲାମାନଙ୍କୁ ସରକାରୀ ସ୍କୁଲରେ ପଢ଼ାଇବା ପାଇଁ ଉତ୍ସାହିତ ହେବେ I ଏହା ଓଡିଶାରେ ସାମୁହିକ ମାନବ ବିକାଶରେ ସହାୟକ ହେବ I ଯଦି କୌଣସି ପିଲା ଯୁକ୍ତ ୨ ଯାଏ ଭଲରେ ପଢ଼ିଥାଏ ତେବେ ସେ ଯେକୌଣସି କାମକରି ନିଜର ନିଵିକା ନିର୍ବାହ କରିପାରିବ ଓ ଏକ ଉତ୍ତମ ନାଗରିକ ହୋଇପାରିବ I ଓଡ଼ିଶାର ସ୍କୁଲଗୁଡିକ ପାଠ ସାଙ୍ଗରେ କୃଷି, ହସ୍ତ ଶିଳ୍ପ, ଯୋଗ, ନୈତିକତା, ନେତୃତ୍ୱ ବିକାଶ, ସମାଜ ସେବା, ପରିବେଶ ସୁରକ୍ଷା ଓ ଖେଳକୁଦ ଉପରେ ମଧ୍ୟ ଧ୍ୟାନ ଦେବା ଉଚିତ I ଉତ୍ତମ ସ୍କୁଲ ଶିକ୍ଷାର ଅଭାବରୁ ଆଜି ଓଡ଼ିଶାରେ ଅପରାଧ, ନିଶା ବେପାର, ଭ୍ରଷ୍ଟାଚାର, ପାରିବାରିକ ହିଂସା, ଇର୍ଷା ଓ ପରଶ୍ରୀ କାତରତା ବଢି ଚାଲିଛି I ଉତ୍ତମ ସ୍କୁଲ ଶିକ୍ଷା ପାଇଥିବା ଯୁବପିଢ଼ି ସମାଜର ସବୁକ୍ଷେତ୍ରରେ ଭଲ କାମକରି ଲୋକମାନଙ୍କର ଜୀବନ ମାନରେ ଗୁଣାତ୍ମକ ପରିବର୍ତନ ଆଣିପାରନ୍ତି I
ବ୍ରିଟିଶ ଶାସନ ସମୟରେ ଓଡ଼ିଶାର ଭାଷା, ସଂସ୍କୃତି ଓ ଓଡ଼ିଆର ଆତ୍ମଅଭିମାନ ବିଲୁପ୍ତ ହେବାକୁ ବସିଥିଲା I ଅଜିମଧ୍ୟ ଓଡ଼ିଶାର ଯୁବପିଢ଼ି ବାହାର ରାଜ୍ୟରେ ନିଜକୁ ଓଡ଼ିଆ ବୋଲି ପରିଚୟ ଦେବାକୁ କୁଣ୍ଠା ବୋଧ କରୁଛନ୍ତି I ସାଧାରଣ ଇଂରାଜୀ ମିଡିୟମ ସ୍କୁଲରେ ପାଠପଢିବା ପରେ ଅନେକ ପିଲା ଖଣ୍ଡି ଓଡ଼ିଆ କହି ନିଜେ ଓଡ଼ିଆ ଶିଖିନାହାନ୍ତି ବୋଲି କହି ଗର୍ବ ଅନୁଭବ କରୁଥିବାର ଦେଖାଯାଉଛି I ନିଜ ରାଜ୍ୟପାଇଁ ମନରେ ଗର୍ବ ଓ ଆତ୍ମ ଅଭିମାନ ନଥିଲେ କୌଣସି ଜାତି ପ୍ରଗତି କରିପାରେନାହିଁ I ମରାଠୀ, ତାମିଲ, ତେଲୁଗୁ, ଗୁଜରାଟୀ ଓ ବେଙ୍ଗଲୀ ଲୋକେ ନିଜର ଭାଷା ଓ ସଂସ୍କୁତିକୁ ବଞ୍ଚାଇ ରଖିଛନ୍ତି I ଓଡିଶା ସରକାର ପ୍ରଥମେ ଯୁବପିଢିଙ୍କୁ ଓଡ଼ିଶାର ସଂସ୍କୃତି, ଫସଲ ବିଭିଧତା, ଓଡ଼ିଶାର ଗୌରବଜ୍ୱଲ୍ୟ ଇତିହାସ, ହସ୍ତଶିଳ୍ପ ପରମ୍ପରା, ନୌବାଣିଜ୍ୟ ଓ ପ୍ରାଚୀନ ଓଡ଼ିଶାର ଆର୍ଥିକ ପ୍ରଗତି ବିଷୟରେ ଅବଗତ କରିବା ଉଚିତ I ଏହା ଯୁବପିଢିଙ୍କ ଭିତରେ ଆତ୍ମଅଭିମାନ ସୃଷ୍ଟି କରିବ I ଓଡ଼ିଶାର ସୀମାନ୍ତ ର୍ଜିଲ୍ଲା ଗୁଡିକରେ ଆଜି ଓଡ଼ିଆ ଭାଷା ସଂସ୍କୁତି ଲୋପ ପାଇବାକୁ ବସିଲାଣି I ପ୍ରତ୍ୟେକ ସୀମାନ୍ତ ଜିଲ୍ଲାଗୁଡିକରେ ଓଡ଼ିଆ ଭାଷା ବାଧ୍ୟତା ମୂଳକ କରିବା ସଂଗେ ସଂଗେ ଓଡ଼ିଆ ଭାଷାର ସୁରକ୍ଷା ପାଇଁ ଅଧିକ ଓଡ଼ିଆ ସ୍କୁଲ ଓ ଓଡ଼ିଆ ପାଠାଗାର ଖୋଲିବା ଦରକାର I ଓଡ଼ିଆ ସଂସ୍କୁତିର ପ୍ରସାର ପାଇଁ ଏହି ଜିଲାଗୁଡିକରେ ସରକାର ଅଧିକ ସଂଖ୍ୟାରେ ଓଡ଼ିଆ ଶିକ୍ଷକ ନିଯୁକ୍ତି କରିବା ଉଚିତ I ସୀମାବର୍ତୀ ଜିଲ୍ଲାଗୁଡିକରେ ଓଡିଶୀ ନୃତ୍ୟ, ପାଲା, ଦାସକାଠିଆ ଓ ଛଉ ନୃତ୍ୟ ଇତ୍ୟାଦି ନିୟମିତ ଭାବରେ ପରିବେଷଣ ହେବା ଉଚିତ I
ଏକଦା ଶସ୍ୟଶ୍ୟାମଳା ଓଡ଼ିଶା ଆଜି ତାହାର ହଜାର ହଜାର ଏକର ଚାଷ ଜମିକୁ ହରାଇ ବସିଛି I ଚାଷ ଉପଯୋଗୀ ବାତାବରଣ ନଥିବାରୁ ଲୋକେ ଉର୍ବର ଚାଷଜମି ଗୃହ ନିର୍ମାଣ କମ୍ପାନୀମାନଙ୍କୁ ବିକିଦେଉଛନ୍ତି କିମ୍ବା ଛୋଟ ଚାଷୀମାନଙ୍କୁ ଭାଗରେ ଦେଉଛନ୍ତି I ଏକଦା ପୁରୀ- ବାଲେଶ୍ୱର ଜାତୀୟ ରାଜପଥ 5 ର ଦୁଇ ପାର୍ଶ୍ୱରେ ଫସଲ ବିଭିଧତାର ଏକ ସବୁଜ ବଳୟ ଥିଲା I ଆଜି ଏହା ଅନେକ ଜାଗାରେ ପଡିଆ ପଡିଛି କିମ୍ବା କଂକ୍ରିଟ ଜଙ୍ଗଲରେ ପରିଣତ ହୋଇଛି I ଏକଦା ସାହସୀ, କର୍ମଠ, କୌଶଳୀ ଓ ଅନୁଶାସିତ ଓଡ଼ିଆ ଜାତି ଆଜି ଏକ ଦୁର୍ବଳ ଓ କର୍ମଭୀରୁ ଜାତିରେ ପରିଣତ ହୋଇଛି I ଓଡ଼ିଶାର ଜଗନ୍ନାଥ ସଂସ୍କୃତିରେ ଯେକୌଣସି ଶାରୀରିକ ଶ୍ରମକରିବା ଲଜ୍ୟାଜନକ ନଥିଲା I ଏହି ମାନସିକତାକୁ ଉଦ୍ଜାବିତ କରିବା ପାଇଁ ପ୍ରତି ବର୍ଷ ପୁରୀର ଗଜପତି ମହାରାଜ ରଥଯାତ୍ରା ସମୟରେ ଜଗନ୍ନାଥ, ବଳଭଦ୍ର ଓ ସୁଭଦ୍ରାଙ୍କ ରଥ ଉପରେ ଛେରାପହଁରା କରିଥାନ୍ତି I ଆଜି ଓଡ଼ିଶାର ପରିଶ୍ରମକାତର ଯୁବପିଢିଙ୍କୁ ଉପଯୁକ୍ତ ମାର୍ଗରେ ଆଣିବା ପାଇଁ ସରକାର ପ୍ରଥମେ ଚାଷପାଇଁ ଉଚ୍ଚ କୋଟିର ବିହନ, କୀଟନାଶକ, ସାର ଓ ଜଳ ଇତ୍ୟାଦି ଉପଲବ୍ଧ କରାଇବା ଉଚିତ I ସ୍ଵଛ ବଜାର ବାତାବରଣ, ଫସଲ ବିଭିଧତା, ଫସଲ ବୀମା ଓ କମ ସୁଧର କୃଷି ଋଣର ଉପଯୁକ୍ତ ବିନିଯୋଗ ଚାଷୀଙ୍କୁ ଚାଷକରିବା ପାଇଁ ଉତ୍ସାହିତ କରିବ I
ଯୁବପିଢିଙ୍କ ଶାରୀରିକ ବିକାଶ ହେଲେ ମାନସିକ ବିକାଶ ସହଜରେ ହୋଇପାରିବ I ସରକାର ପ୍ରତ୍ୟେକ ୨୦୦୦ ଲୋକଙ୍କ ପାଇଁ ଏକ ସାର୍ବଜନିକ ଖେଳ ପଡିଆର ପ୍ରାବଧାନ କରିବା ଉଚିତ I ଓଡ଼ିଶାର ସାଂସ୍କୃତିକ ନଗର କଟକର ଅଧିକାଂଶ ସାହିରେ ଫୁଟବଲ, କୁସ୍ତି, କବାଡି, କ୍ରିକେଟ ଓ ଭଲିବଲ ଇତ୍ୟାଦି ଖେଳ ଦେଖିବାକୁ ମିଳୁଥିଲା I ପ୍ରତି ବର୍ଷ ବାରବାଟୀ ଷ୍ଟାଡିଅମରେ ଫୁଟବଲ ଟୁର୍ଣ୍ଣାମେଣ୍ଟ କଟକ ଲିଗ ହେଉଥିଲା I ଚୌଧୁରୀ ବଜାରର କଳିଙ୍ଗ ଜିମ୍ନାସିଅମରେ ପ୍ରତିବର୍ଷ କୁସ୍ତି ପ୍ରତିଯୋଗିତା ଆୟୋଜିତ ହେଉଥିଲା I
କଳିଙ୍ଗ ଜିମ୍ନାସିଅମରୁ ପ୍ରଶିକ୍ଷଣ ନେଇ ବିରଜା ପ୍ରସାଦ ଦାସ ସୁନ୍ଦର ସ୍ୱାସ୍ଥ୍ୟ ପ୍ରତିଯୋଗିତାରେ ଭାରତ ଶ୍ରୀ ଉପାଧି ଅର୍ଜନ କରିଥିଲେ I କଟକର ବନା ପହିଲମାନ ଭାରତ ଓ ଭାରତ ବାହାରେ କୁସ୍ତି ପ୍ରତିଯୋଗିତାରେ ସୁନାମ ଅର୍ଜନ କରିଥିଲେ I ପୁରୀର ପ୍ରତ୍ୟେକ ସାହିରେ ଜାଗାଘର ଥିଲା I ସାହିର ଯୁବପିଢ଼ି ଜାଗାଘରେ କୁସ୍ତି ଓ ଭାର ଉତ୍ତାଳନର ପ୍ରଶିକ୍ଷଣ ନେଉଥିଲେ I ଆଜି ଏହି ଦୁଇଟି ସହରର ଯୁବପିଢ଼ିଙ୍କ ଭିତରେ ଶାରୀରିକ ବିକାଶ ପାଇଁ କୌଣସି ଉତ୍ସାହ ନାହିଁ I ମାର୍ଗ ଦର୍ଶନର ଅଭାବରୁ ଅନେକ ଯୁବକ ନିଶାସକ୍ତ ହୋଇ ଆଳସ୍ୟ ଜୀବନ ଜାପାନ କରୁଛନ୍ତି I ସାର୍ବଜନିକ ଖେଳ ପଡିଆର ଅଭାବରୁ ଅନେକ ଯୁବକ ଘରେ ବସି କମ୍ପୁଟର ଓ ମୋବାଇଲରେ ଗେମ ଖେଳିବାକୁ ବାଧ୍ୟ ହେଉଛନ୍ତି I ଏକଦା କଟକ, ପୁରୀ, ଭୁବନେଶ୍ୱର ଓ ବ୍ରହ୍ମପୁର ଆଦି ସହରରେ ଅନେକ ସାର୍ବଜନିକ ପଡିଆ ଥିଲା ଓ ଏହା ଯୁବପିଢିଙ୍କର ମାନସିକ ଓ ଶାରୀରିକ ବିକାଶରେ ସହାୟକ ହେଉଥିଲା I ଆଜି ସମସ୍ତ ସହରରେ ଖାଲି କଂକ୍ରିଟ ଜଙ୍ଗଲ ଦେଖିବାକୁ ମିଳୁଛି I ଖେଳ କୁଦର ଅଭାବରୁ ଅନେକ ଯୁବକ ନିଜର ମାନସିକ ସଂତୋଲନ ହରାଇ ହିଂସ୍ର ଆଚରଣ ଦେଖାଉଛନ୍ତି I ସରକାର ଯୁଦ୍ଧକାଳୀନ ଭିତ୍ତିରେ ଯୁବପିଢିଙ୍କ ପାଇଁ ସାର୍ବଜନିକ ଖେଳପଡିଆର ପ୍ରାବଧାନ କରିବା ଉଚିତ I ରାଜ୍ୟବାସୀଙ୍କର ମାନସିକ ଓ ଶାରୀରିକ ବିକାଶ ନକରି ରାଜସ୍ବ ସୃଷ୍ଟି କରିବାରେ କିଛି ଫାଇଦା ନଥାଏ I
ଓଡିଶାବାସୀଙ୍କର ସ୍ୱାସ୍ଥ୍ୟର ସୁରକ୍ଷା ପାଇଁ ପ୍ରତ୍ୟେକ ସରକାରୀ ଡାକ୍ତରଖାନାରେ ଉପଚାର ପାଇଁ ଅନୁଭବୀ ଡାକ୍ତର , ନର୍ସିଙ୍ଗ ସୁବିଧା ଓ ଜୀବନ ରକ୍ଷାକାରୀ ଔଷଧ ଓ ଅନ୍ୟାନ୍ୟ ସରଞ୍ଜାମ ଉପଲବ୍ଧ ହେବା ନିହାତି ଜରୁରୀ I ସମାଜରେ ରୋଗ ବ୍ୟାଧି କମ କରିବା ପାଇଁ ସରକାର ଭେଜାଲ ଔଷଧ ଓ ଭେଜାଲ ଖାଦ୍ୟ ବନାଉଥିବା କମ୍ପାନୀ ମାନଙ୍କ ଉପରେ ନିରନ୍ତର ଚଢ଼ାଉ କରି ଏହାର ଜଡକୁ ସମ୍ପୂର୍ଣ୍ଣ ନଷ୍ଟ କରିଦେବା ଉଚିତ I ଏସବୁ ସମ୍ଭବ ହେବ ଯଦି ସରକାର, ବୁଦ୍ଧିଜୀବୀ, ଗଣମାଧ୍ୟମ, ସକାରାତ୍ମକ ଚିନ୍ତା ଥିବା ସାହି ମୁରବୀ, ଗ୍ରାମର ମୁଖିଆ ଓ ଯୁବପିଢ଼ି ନିଜ ନିଜ ଇଲାକାରେ ମାନବ ବିକାଶ ପାଇଁ ନିଜକୁ ସମ୍ପୂର୍ଣ ନିୟୋଜିତ କରିବେ I
