ନେତାଏ ସଧାରଣ ଲୋକଙ୍କ ସମସ୍ୟା ଅଙ୍ଗେ ନିଭାଇବା ଦରକାର

                                  

               (This article was published in Dinalipi on 12.12.2021)

ଓଡ଼ିଶାର ମୁଖ୍ୟମନ୍ତ୍ରୀ ଯଦିଓ ଓଡ଼ିଆରେ ପ୍ରାଞ୍ଜଳ ଭାବରେ କହିପାରୁନାହାନ୍ତି ତଥାପି ସେ ମୁଖ୍ୟମନ୍ତ୍ରୀ ହିସାବରେ ଦୀର୍ଘ ୨୦  ବର୍ଷରୁ ଅଧିକ ସମୟ ଅତିବାହିତ କଲେଣି  I   ଡୁନ ସ୍କୁଲରୁ ଶିକ୍ଷା ପାଇଥିବା ଓଡ଼ିଶାର ମୁଖ୍ୟମନ୍ତ୍ରୀ ଇଂରାଜୀ ଭାଷାରେ କହିବା ଓ ଲେଖିବାରେ ଭାରତର ସମସ୍ତ ମୁଖ୍ୟମନ୍ତ୍ରୀମାନଙ୍କ ଭିତରେ ଅନ୍ୟତମ କହିହେବ I  ଅନେକ ରାଜ୍ୟର ମୁଖ୍ୟମନ୍ତ୍ରୀ ଇଂରାଜୀରେ ବିନା  ତ୍ରୁଟିରେ ନିଜର ବିଚାର ବ୍ୟକ୍ତ କରିପାରନ୍ତିନି,  ଲେଖିବାତ ଦୂରର କଥା  I  ଇଂରାଜୀ ଭାଷାରେ ସରଳ ଭାବରେ ନିଜର ବିଚାରକୁ ବ୍ୟକ୍ତ କରିପାରୁଥିବାରୁ ନବୀନ ପଟ୍ଟନାୟକ କେବଳ ଓଡ଼ିଶାରେ ନୁହେଁ ସାରା ଭାରତରେ ନିଜର ଭାବମୂର୍ତ୍ତିକୁ ପ୍ରତିଷ୍ଠିତ କରିପାରିଛନ୍ତି   I  ନବୀନ ପଟ୍ଟନାୟକଙ୍କ ପିତା ସ୍ବର୍ଗତ ବିଜୁ ପଟ୍ଟନାୟକ ଓଡ଼ିଆ ଭାଷାରେ ସୁନ୍ଦର ଭାବରେ ଭାଷଣ  ଦେଇପାରୁଥିଲେ   I  ବିଜୁ ପଟ୍ଟନାୟକ ଓଡିଶା ପାଇଁ ଅନେକ ରାଜ୍ୟ ଉପଯୋଗୀ ରାଷ୍ଟ୍ରୀୟ ପ୍ରକଳ୍ପ ଆଣିବାରେ ନିଜର ସାମର୍ଥ୍ୟ ଦେଖାଇ ଥିଲେ  I  ମହାରାଷ୍ଟ୍ର, ତେଲେଙ୍ଗାନା, ତାମିଲ ନାଡୁ ଓ ଆନ୍ଧ୍ରର ଶାସକଦଳ ଓ ବିରୋଧୀଦଳର ନେତାମାନେ ନିଜ ରାଜ୍ୟକୁ ରାଷ୍ଟ୍ରୀୟ ପ୍ରକଳ୍ପ,  କେନ୍ଦ୍ରୀୟ ବିକାଶ ଯୋଜନା ଓ ସବସିଡି ଆଣିବା ପାଇଁ ଯାଆଁଳା ଭାଇଭଳି  ଅଂଟାଭିଡି କାମ କରିଥାନ୍ତି  I  ରାଜ୍ୟ ଉପଯୋଗୀ ବିକାଶକୁ  ଚିନ୍ହି  ରାଜ୍ୟର ବିକାଶ କରିବାରେ ରାଜନୈତିକ ନେତାଙ୍କର ଦକ୍ଷତା ସାବିତ ହୋଇଥାଏ  I   ଓଡିଶା ଏକ ସମୃଦ୍ଧ ରାଜ୍ୟ ହେବା ପାଇଁ ସମସ୍ତ ସମ୍ଭାବନା ଥିଲେ ମଧ୍ୟ ଏକ ବ୍ୟବହାରିକ ମୂଳ ଚିନ୍ତାଧାରା ଥିବା ଲୋକଉପଯୋଗୀ ବିକାଶ ମଡେଲର  ଅଭାବରୁ ଆଜି ରାଜ୍ୟରେ ଅନେକ ସାମାଜିକ ଓ ଆର୍ଥିକ ସମସ୍ୟା ଦେଖା ଦେଇଛି  I ଏଥିପାଇଁ  ରାଜ୍ୟର ବୁଦ୍ଧିଜୀବୀ, ଶାସକ ଓ ବିରୋଧୀ ଦଳର ନେତାମାନେ ମଧ୍ୟ ଦାୟୀ  I

 

ଓଡ଼ିଶାର ଶାସକ ଦଳ ବିଜେଡି କୋଡ଼ିଏ ବର୍ଷରୁ ଉର୍ଦ୍ଧ ଶାସନରେ ରହିଲା ପରେ ମଧ୍ୟ ଓଡିଶା ବାସୀଙ୍କର ସାମୁହିକ ଅର୍ଥନୈତିକ ବିକାଶ କରିବାରେ ସକ୍ଷମ  ହୋଇନାହିଁ  I  ଫଳରେ ଲକ୍ଷ ଲକ୍ଷ ଶିକ୍ଷିତ ଓ ଅଶିକ୍ଷିତ ଯୁବକ ରାଜ୍ୟ ଛାଡି ବାହାର ରାଜ୍ୟ ଓ ବିଦେଶକୁ ଚାଲିଯାଉଛନ୍ତି  I  ରାସ୍ତା ଅଛି ସତ କିନ୍ତୁ ଗମନା ଗମନ ପାଇଁ ପରିବହନର ସୁବିଧା ନାହିଁ  I  ଉର୍ବର ଚାଷ ଜମିଥିଲେ ମଧ୍ୟ ପାଣିର ସୁବିଧା ନାହିଁ  I  ସରକାରୀ ସ୍କୁଲ ଅଛି ସତ କିନ୍ତୁ ଉତ୍ତମ ମାନର ଶିକ୍ଷା ମିଳୁ ନାହିଁ  I  ଖେଳାଳି ଅଛନ୍ତି କିନ୍ତୁ ଖେଳ ପଡ଼ିଆର ସୁବିଧା ନାହିଁ  I   ହସ୍ପିଟାଲ ଅଛି କିନ୍ତୁ ଉପଚାରର ସୁବିଧା ନାହିଁ ଯାହାଫଳରେ ଲୋକେ ପାଇଁ ଭୁବନେଶ୍ୱର ଓ କଟକ ଉପରେ ନିର୍ଭର କରୁଛନ୍ତି   I  ଗାଁ ଅଛି କିନ୍ତୁ ଗାଁ ରେ ଆଉ ଜୀବିକା ଅର୍ଜନ କରି ସ୍ୱାଭିମାନର ସହିତ ବଂଚିବା ପାଇଁ ସୁବିଧା ନାହିଁ    I   ଓଡ଼ିଶାର କଳା ସଂସ୍କୃତି ଅଛି କିନ୍ତୁ  କଳାତ୍ମକ ମାନ ରକ୍ଷା କରାଯାଇପାରିନାହିଁ  I  ଅନେକ ପର୍ଯ୍ୟଟନ କ୍ଷେତ୍ର ଅଛି କିନ୍ତୁ ପର୍ଯ୍ୟଟକ ମାନଙ୍କୁ ଆକୃଷ୍ଟ କରିବା ପାଇଁ ମନୋରମ ପ୍ରାକୃତିକ ପରିବେଶ ଆଉ ନାହିଁ   I   ଅଦରକାରୀ କଂକ୍ରିଟ ଜଙ୍ଗଲ ସୃଷ୍ଟି କରିବା ଦ୍ୱାରା ଓଡିଶାର ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ହୋଇଗଲାଣି   I  ବିଶ୍ୱ ପ୍ରସିଦ୍ଧ ନନ୍ଦନ କାନନଆଜି ତାହାର ପ୍ରାକୃତିକ ପରିବେଶ ଓ ବନ୍ୟଜନ୍ତୁର ବିଭିର୍ଣ୍ଣତା ହରାଇ ବସିଛି   I  ଯେଉଁଠି ଏକଦା ୩୦ ରୁ ଅଧିକ ଧଳା ବାଘ ଓ ମହାବଳ ବାଘ ପର୍ଯ୍ୟଟକମାନଙ୍କର ଆକର୍ଷଣର କେନ୍ଦ୍ରବିନ୍ଦୁ ଥିଲେ  ଆଜି ସେଠାରେ  ଦୁଇ ଚାରିଟା  ରୋଗା ବାଘ ଏପଟ ସେପଟ ହେଉଛନ୍ତି  I  ଅଦରକାରୀ କଂକ୍ରିଟ ଢାଞ୍ଚା  ଗୁଡିକ ତିଆରି ହେବା ଦ୍ୱାରା ଏହା ନନ୍ଦନ  କାନନର ମନୋରମ ପରିବେଶକୁ ନଷ୍ଟ କରିଦେଇଛି  I

 

ଓଡ଼ିଶାର ବିରୋଧିଦଳଗୁଡିକ  ରାଜ୍ୟର ପ୍ରକୃତ ସମସ୍ୟା ଉପରେ ତୃଣମୂଳ ତଥ୍ୟ ଓ ଗବେଷଣାର ଅଭାବରୁ ଅନ୍ଧାରରେ ବାଡ଼ି ବୁଲାଉଥିବା ଭଳି ଲାଗେ  I ନବୀନ ସରକାରଙ୍କ ଦୀର୍ଘ ଦୁଇ ଦଶନ୍ଧି କାଳ ଶାସନ ବିରୋଧୀ ଦଳମାନଙ୍କର ଅପାରଗତାକୁ ପଦାରେ ପକାଇଦେଲା ଭଳି ଲାଗେ  I     ଏକ ମଝଭୁତ ବିକଳ୍ପ ଅଭାବରୁ ରାଜ୍ୟରେ ଯାହା ସମସ୍ୟା ସୃଷ୍ଟି ହୁଏ ସେଗୁଡିକ ନିରୀହ ଓଡିଶାବାସୀଙ୍କୁ ନୀରବରେ ସହିବାକୁ ପଡୁଛି   I ଲମ୍ବା ସମୟ ଧରି  କରୋନା  ଲକଡାଉନ ଯୋଗୁ ବେରୋଜଗାରୀ ବଢିବା,  ଶହ ଶହ କରୋନା ରୋଗୀଙ୍କର ଅକାଳ ମୃତ୍ୟ, ପେଟ୍ରୋଲ  ଦର ବୃଦ୍ଧିହେତୁ ଦରକାରୀ ଜିନିଷର ଅତ୍ୟଧିକ  ଦରବୃଦ୍ଧି,  ବାତ୍ୟା, ବଢି ଓ ମରୁଡି ଇତ୍ୟାଦି ଓଡିଶାବାସୀଙ୍କୁ ହନ୍ତ ସନ୍ତ କରିଦେଇଛି  I  ବେରୋଜଗାରୀ ଓ ପୃଷ୍ଟିହୀନତା ରାଜ୍ୟରେ ଏକ ଭୟଙ୍କର ରୂପ ନେଇଛି  I  ଓଡ଼ିଶାର ଲକ୍ଷ ଲକ୍ଷ ଯୁବକ ଦୂର ରାଜ୍ୟକୁ ମୁଲ ଲାଗିବା ପାଇଁ ଚାଲିଯାଉଛନ୍ତି  I  ଫଳରେ ରାଜ୍ୟରେ କୃଷିକାମ ପାଇଁ ଲୋକ ମିଳୁନାହାଁନ୍ତି   I   ଓଡିଶାବାସୀ ଟଙ୍କିକିଆ ଚାଉଳ ଖାଇ ଅଳସୁଆ ହୋଇଯାଇଥିବାରୁ ବାହାର ରାଜ୍ୟରୁ ଅନେକ ଲୋକ ଓଡ଼ିଶାରେ କାମ କରୁଥିବାର ଦେଖାଯାଉଛି  I  ଏଭଳି ପରିସ୍ଥିତି ଯଦି ଆଉ କିଛି ବର୍ଷ ଚାଲେ ତେବେ ଓଡିଶା ତାର ଶିକ୍ଷିତ ଓ ଉଦ୍ଯୋଗୀ ଯୁବପିଡିକୁ ହରାଇବ  ବୋଲି ଅନେକ ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି  I  ସ୍ୱାଭିମାନ ଥିବା ଓଡ଼ିଆ ନେତାମାନେ ଓଡ଼ିଆ ଯୁବକଙ୍କୁ  ଓଡ଼ିଶାରେ ରୋଜଗାରକ୍ଷମ  କରିବା ପାଇଁ ଉପଯୁକ୍ତ ବାତାବରଣ ସୃଷ୍ଟି କରିବା ଉଚିତ  I  

 

କେତେକ ସ୍ୱାସ୍ଥ୍ୟ ବିଶେଷଜ୍ଞଙ୍କ କହିବା ଅନୁସାରେ ଘରୋଇ ହସ୍ପିଟାଲ ଗୁଡିକର ଲାଭଖୋର ନୀତି, କରୋନା 

ରୋଗୀର ଉପଚାରରେ ତ୍ରୁଟି ଓ କରୋନା ରୋଗୀଙ୍କୁ ଚିକତ୍ସା କରିବାପାଇଁ ପର୍ୟାପ୍ତ ସୁବିଧା ନଥିବାରୁ ଅନେକ ନିରୀହ ଲୋକ ଅକାଳ ମୃତ୍ୟୁର ଶିକାର ହୋଇଥିଲେ  I  ଓଡ଼ିଶାର ସ୍ୱାସ୍ଥ୍ୟ ସେବାର ଗୁଣାତ୍ମକ ମାନ  ସରକାର ଓ ବିରୋଧୀ ଦଳ ଗୁଡିକର ତତ୍ପରତା ଓ ସମ୍ବେଦନଶୀଳତା ଉପରେ ନିର୍ଭର କରେ  I ଓଡ଼ିଶାରେ କେତୋଟି ଘରୋଇ ହସ୍ପିଟାଲ ଓ ସରକାରୀ ହସ୍ପିଟାଲ ଅଛି ପଚାରିଲେ ନେତାମାନେ ଆଵା କାବା ହୋଇଯାନ୍ତି I  କେତୋଟି ହସ୍ପିଟାଲ ରୋଗୀ ଉପଯୋଗୀ ଅଛି ଏହା ବିରୋଧୀଦଳ ନେତା ଜାଣନ୍ତି ନାହିଁ  I   ରୋଗୀ ଅନୁପାତରେ କେତେ ଡାକ୍ତର ଦରକାର ଏହା ମଧ୍ୟ କେହି କହିପାରିବେ ନାହିଁ  I  ହସ୍ପିଟାଲ ରେ ଥିବା ସୁବିଧାକୁ ବିରୋଧୀ ଦଳ ନେତାମାନେ ନିୟମିତ ଭାବରେ ଯାଞ୍ଚ କରନ୍ତି ନାହିଁ  I    କଣ କଲେ ଓଡ଼ିଶାର ସ୍ୱାସ୍ଥ୍ୟ ସେବାରେ ଉର୍ନତି ହେବ ଏବିଷୟରେ ସେମାନେ କୌଣସି ପ୍ରସ୍ତାବ ପ୍ରସ୍ତୁତ କରିପାରିବେନାହିଁ   I

 

ଓଡିଶାବାସୀଙ୍କର ସ୍ୱାସ୍ଥ୍ୟର ଉର୍ନତି ପାଇଁ ଓଡ଼ିଶାରେ ଯୁବକ ମାନଙ୍କ ପାଇଁ ଖେଳ କୁଦର ବ୍ୟବସ୍ଥା ଅଛି କି ନାହିଁ ଓ ଓଡ଼ିଶାରେ ଲୋକଙ୍କୁ ପର୍ୟାପ୍ତ ପରିମାଣରେ ପୃଷ୍ଟିକର ଖାଦ୍ୟ ଓ ପାନୀୟ ଜଳ ଉପଲବ୍ଧି ହେଉଛି କି ନାହିଁ ଏହା ଜାଣିବା କଷ୍ଟକର I  ଓଡ଼ିଶାରେ ବ୍ୟାଙ୍କ ଋଣ ଓ ବିଭିର୍ନ ପ୍ରକାରର ସବସିଡି ପ୍ରକୃତ ହିତାଧିକାରୀମାନଙ୍କ ପାଖରେ ପହଁଚୁଛି କି ନାହିଁ ଏହାର ଯାଞ୍ଚ ବିରୋଧୀ ଦଳ ଓ ଗଣମାଧ୍ୟମ କରିବା ଉଚିତ  I  ଓଡ଼ିଶାରେ କେତୋଟି ନଦୀ, ହ୍ରଦ ଓ ପୋଖରୀ ଅସୁରକ୍ଷିତ ଅବସ୍ଥାରେ ଅଛି କିମ୍ବା ଜବର ଦଖଲ ହେଲାଣି ଏହାର ସମ୍ପୂର୍ଣ ଡାଟା ମିଳିବା କଷ୍ଟକର  I  ଓଡ଼ିଶାର ସୀମାବର୍ତୀ ଜିଲା ଗୁଡିକରେ କେତେ ଜାଗା ବାହାର ରାଜ୍ୟର ଲୋକେ କବ୍ଜା କରିଛନ୍ତି ଏହାର କୌଣସି ହିସାବ ନାହିଁ   I   

ସୀମାବର୍ତୀ ଜିଲାରେ କେତେଜଣ  ଓଡିଶାବାସୀ ତାଙ୍କର ମାତୃଭାଷାକୁ ଭୁଲିଗଲେଣି ଏହାର କୌଣସ ଆକଳନ ହୋଇନାହିଁ   I   ଛତିଶଗଡ ସରକାର ମହାନଦୀ ଉପରେ ଅନେକ ଡ୍ୟାମ କରିବା ଦ୍ୱାରା ଚିରସ୍ରୋତା ମହାନଦୀ ଆଜି ତାହାର ସ୍ରୋତକୁ ହରାଇ ବସିଛି  I  ଓଡ଼ିଶାର ଜୀବନରେଖା ମହାନଦୀର ସୁରକ୍ଷା ପାଇଁ ଓଡ଼ିଶାରେ କୌଣସି ତତ୍ପରତା ଦେଖାଯାଉନାହିଁ  I  ଓଡ଼ିଶାରେ ବନିଥିବା କଳ କାରଖାନାରେ କେତେଜଣ ଓଡ଼ିଆ ଯୁବକ କର୍ମ ନିୟୁକ୍ତିପାଇଛନ୍ତି ଏହାର କୌଣସି ଆକଳନ ନାହିଁ  I  

 

ଓଡ଼ିଶାର ସାଂସ୍କୃତିକ, ସାମାଜିକ ଓ ଆର୍ଥିକ ବିକାଶ ପାଇଁ ସରକାର ଓ ବିରୋଧୀ ଦଳର ନେତାମାନେ ଏକ 

ଦୃଢ ସଂକଳ୍ପ ନେବା ଉଚିତ  I  ରାଜନୈତିକ ଦଳଗୁଡିକ ନିଜ ଦଳକୁ  ଅପରାଧୀ ମୁକ୍ତ କରିବା ପାଇଁ ପଦକ୍ଷେପ ନେବା ଉଚିତ  I  କୌଣସି ଅସାମାଜିକ ବ୍ୟକ୍ତି ଯେଭଳି ଶାସନକଳକୁ ପ୍ରଦୂଷିତ ନକରେ ସେଥିପାଇଁ ଦୃଢ ପଦକ୍ଷେପ ନେବା ଉଚିତ  I     ଓଡିଶା ଉପଯୋଗୀ ବିକାଶ ପାଇଁ ଉପଯୁକ୍ତ ଓଡ଼ିଆ ଅଧିକାରୀଙ୍କୁ ଦାୟିତ୍ୱ ଦେବା ଦରକାର   I ବିରୋଧୀ ଦଳ ଓ ଗଣମାଧ୍ୟମ ଓଡ଼ିଶାରେ ହେଉଥିବା ବିକାଶମୂଳକ କାମଗୁଡିକର ମୂଲ୍ୟାୟନ କରିବା ପାଇଁ  ନିଜଭିତରେ ସାମର୍ଥ୍ୟ ସୃଷ୍ଟି କରିବା ଦରକାର  I  ବିକାଶ ମୂଳକ କାର୍ଯ୍ୟଗୁଡିକର ମୂଲ୍ୟାୟନ କରିବା ସଂଗେ ସଂଗେ ସମସ୍ୟାର ସମାଧାନର ବାଟ ମଧ୍ୟ ଦର୍ଶାଇବା ଦରକାର   I  ଓଡିଶା ଏକ ସମୃଦ୍ଧ ରାଜ୍ୟ ହେବପାଇଁ  ଓଡିଶାବାସୀଙ୍କ ଭିତରେ ଦରକାର  ଆତ୍ମବିଶ୍ୱାସ, ସ୍ୱାଭିମାନ, ପ୍ରଖର ରାଜନୈତିକ ଇଚ୍ଛା ଶକ୍ତି, ସାହସ ଓ  କର୍ମନିପୁଣତା  I